Santurtziko San Joan Jainkoarena ospitaleak Euskadiko Azpiegitura Sentikorrak Babesteko Planeko (EASP) kide dela egiaztatzen duen diploma jaso du. Ziurtagiria osasun zentroan bertan eman du Sheila Rivera Perezek, Eusko Jaurlaritzako Segurtasuna Koordinatzeko Zuzendaritzaren alboko, eta Vicente Fernandez Zurita ospitaleko zuzendari-kudeatzaileak jaso du.

Horrez gain, EASPko bulego teknikoko Iker Alkorta eta Ainhoa Martínez ere izan ziren diploma emateko ekitaldian, eta honako hauek egin zieten harrera: Mariano Bernabé Otero Anaia, San Joan Jainkoarena Anaien Komunitateko nagusia; Pablo Lledó, Marian Lanzagorta, Iñigo Benegas eta Maite García, Santurtziko San Joan Jainkoarena Ospitaleko Zuzendaritza Batzordeko kideak; eta Sonia García, zentro horretako Kalitate, Prebentzio eta Ingurumen koordinatzailea.

Diploma ematea Euskadiko 2025eko Segurtasun Publikoaren Plan Orokorraren ildo estrategikoen barruan kokatzen da. Plan horrek berrogeita hamar zerbitzu operadore baino gehiago ditu dagoeneko, Euskadiko Azpiegitura Sentikorrak Babesteko Planaren (EASP) barruan, informazioaren eta komunikazioen teknologien, energiaren, osasunaren, gobernuaren eta administrazio publikoaren sektoreetakoak, besteak beste.

Diplomak egokitze prozesu baten ondoren eman ziren. Prozesu horretan bilera asko egin dira, Segurtasun Plan Korporatiboa kudeatu da eta azpiegiturak eta prozesuak egiaztatu dira. Kanpoko erakunde batek balioztatu ondoren, EASP diploma lortu da.

Vicente Fernández Zurita Santurtziko San Joan Jainkoarena Ospitaleko zuzendari-kudeatzaileak adierazi zuen bezala, «gure ospitaleak, euskal osasun sistemako kide gisa, bere bizitzako ehun urte baino gehiagotan erakutsi du Bizkaiko herritarren osasun beharrei erantzuteko borondate argia duela, eta administrazio publikoekin eta osasun erakunde pribatuekin lankidetza leiala eta etengabea duela. Guk, irabazi asmorik gabeko erakunde gisa, hainbat lankidetza adibide ditugu, duela gutxi egindakoak, esate baterako Osakidetzako Zainketa Aringarrien Unitatearen inaugurazioa edo COVID-19aren pandemia dela eta zentroa Osasun sailaren esku jartzea. Erronka edo mehatxu estrategikoen aurrean diploma hau beste urrats bat da, azpiegitura sentikorren komunikazio eta funtzionamendu integratua egituratzen eta sistematizatzen duen ildo horretan».

Euskadiko Azpiegitura Sentikorrak Babesteko Planak (EASP) euskal sare estrategikoa segurtasun arloan gaitzeko erronka eta aukerekin lotutako alderdiak lantzen ditu, mehatxuak barne hartuta arlo fisikoan, digitalean eta ingurumenarenean. Elkargune horrek, gainera, aukera ematen dio euskal ekosistemari eragileen arteko lankidetza sare bat izateko eta etengabeko hobekuntzako eta oinarrizko eboluzioko eredu bat izateko, funtsezko zerbitzuen eremuan sortzen ari diren arriskuei eta mehatxuei eraginkortasunez aurre egiteko. Erakunde publikoen eta pribatuen presentziak, zerbitzu horien segurtasun eta babesari dagokionez, lankidetzan oinarritutako ikuspegi baten garrantzia azpimarratzen du.

Lankidetza sareak sortzea funtsezko elementu bihurtu da Euskadiko segurtasun estrategian. Sare horiei esker azpiegitura kritikoak babesten diharduten eragileek elkarrekin lan egin dezakete, arazoei eraginkortasunez aurre egiteko eta edozein larrialdiren aurrean ekintzak koordinatzeko.

Duela urte batzuetatik hona Eusko Jaurlaritzak aurrera egiten dihardu azpiegitura estrategikoen babesean, osasun azpiegiturak barne, ikuspegi integral eta interkonektatuarekin, mehatxuen eta Europako arau esparruaren (NIS2, DORA, CRA, AI-Act) bilakaera azkarrera egokituz.