Ignacio García Ergüin zendu da, Ospitaleko sarrerako horma-irudiaren egilea eta euskal artearen erreferente nagusietako bat
Ignacio García Ergüin (Bilbo, 1934ko uztailaren 22a), euskal pinturaren funtsezko figura garaikidea, berriki hil da, arteari eskainitako bizitza oparo baten ondoren. Zalantzarik gabe, euskal arte garaikidearen erreferente nagusietako bat izan da, obra zabal eta askotarikoa landu baitzuen, bereziki Bilbo eta haren ingurunea ardatz hartuta. Horregatik, «Bilboko margolaria» esan izan zaio.
2005ean, artistak Mugakoa kalean dagoen Ospitaleko sarrerako horma-irudia sortu zuen. Ondorengo lerroetan, obra horri lotutako gogoeta batzuk partekatu nahi ditugu. Argazki-erreportaje batean jasota daude. Bertan, azken ukituak ematen eta oihala sinatzen ageri da artista, ondoan dituela Pedro de Icaza y Zabálburu jauna (Aguirre Ongintza Fundazioa), anaia José Luis Martín (Anaien Komunitateko nagusia izandakoa) eta Ospitaleko garai hartako beste profesional batzuk. Hona hemen, beraz, aipatutako erreportaje horretan jasotako iruzkin batzuk:
«Santurtziko San Joan Jainkoarena Ospitalea XXI. mendeko lehen hamarkadan planifikatu zen. Arestian adierazi dugun bezala, errespetuan, tradizioan eta aurrez egindako lanetan oinarrituta, pazientziaz heldu zion García Ergüinek proiektuari, baina baita heldutasunez ere, ordurako hainbat horma-irudi egin baitzituen bere ibilbidean zehar, batez ere Bilboko hirian. Aztertu dugun moduan, oraingoan hainbat irudi aurkezten ditugu, ospitaleko atondoan ikus daitekeen artelanari azken ukituak eman zizkion uneak jasotzen dituztenak, lan-prozesua nabarmenduta ekitaldian egindako irudien bidez. Bilbon eta inguruetako herrietan sortutako irudiekin uztartzen den horma-irudi baten aurrean gaude (…)».
«2005eko ekainaren 3an, Pradoko Museoak eta Cervantes Institutuak adierazi zuten Georges de La Tour margolari frantsesa zela San Jeronimo gutun bat irakurtzen margolan argitaragabearen egilea. Urte hartan bertan, joera, berrikuntza eta proiektu handiak metatu ziren García Ergüinen ibilbidean, eta hainbat arte-ekitalditan parte hartu zuen bere obra, bilduma eta gizartearekiko konpromisoa erakusteko».
«Testuinguru horretan, San Joan Jainkoarena Ospitaleak atondoan horma-irudi bat egiteko aukera proposatu zuen, Santurtziko osasun-zentro ikusgarri horretan egindako birmoldaketa garrantzitsuen harira. Herria, gainera, turismoaren atean jotzen jakin duen ingurunearen bikaintasunak inguratzen du. Erakusten ditugun irudietan margolaria bera ikus daiteke, obra lantzen. Bertan dira zuzendaritzako eta mediku-taldeko kideak ere, interes biziarekin begiratuz trazuen bilakaera, pintzelen erabilera, kolorearen berrikuntza eta artelanaren ñabardura desberdinen kudeaketa. Izan ere, atrebentzia ez bada, aitor dezagun inork ez lukeela artelan hau ikusi gabe geratu behar».
Horma-irudian, Ospitalearen funtsa irudikatzen duten zenbait elementu bereizgarri ikus daitezke: Serantes mendia, itsasaldeko fatxadako kanpandorrea, San Joan Jainkoarenaren Anaien Komunitatea eta Gerra Zibilaren garaia, zentroa odol-ospitale bihurtu zenekoa.
Margolana, gainera, Aguirre Ongintza Fundazioak Ospitalearen inaugurazioaren mendeurrenaren kariaz argitaratu zuen liburuaren azala ilustratzeko baliatu zen: Hospital San Juan de Dios de Santurtzi: 100 años cuidando de los vizcaínos dolientes.
Margolari handiaren figura sakonkiago ezagutu nahi duen orori artistaren webgunera jotzea gomendatzen diogu: http://www.garciaerguin.es/.
Ospitaleko familia osatzen dugun guztiok atsekabez jaso dugu artista berezi honen heriotzaren berria, eta gure samina adierazi nahi dugu, bere familia eta lagunei elkartasun osoa helaraziz. Goian bego.
